जयकिसन कोल्सावाला र विलियम बोसिस्टोले अद्र्धशतकीय पारीमा राजधानीमा जारी नेपाल प्रिमियर लिग (एनपिएल)को एलिमिनेटर खेलमा कर्णाली याक्सले चितवन राइनोजलाई जितको लागि एस सय ७६ रनको लक्ष्य दिएको छ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको कर्णाली याक्सले निर्धारित २० ओभरमा ६ विकेट गुमाएर एक सय ७५ रन बनाएको हो ।
कर्णालीको लागि एनपिएलमा पहिलो खेल खेलेका कोल्सावालाले ३९ बल खेल्दै ६ चौका र २ छक्का प्रहार गर्दै सर्वाधिक ५३ रनको अद्र्धशतकीय पारी खेले भने बोसिस्टोले ३९ बलमै ३ चौका र २ छक्का मद्दतमा ५२ रन बनाए ।
त्यस्तै चाडविक वाल्टनले २३ बलमा ४ चौका र ३ छक्का प्रहार गर्दै ४६ रनमा अविजित रहँदा जिसन मक्सुदले १४ रन योगदान जोडे । बलिङमा चितवनका लागि सोहेल तनविरले दुई तथा रवि बोपारा र कप्तान कुशल मल्लको भागमा समान एक-एक विकेट रह्यो ।
यस खेलको विजयी टोलीले फाइनल प्रवेशका लागि आजै हुने पहिलो क्वालिफायरको पराजित हुने टोलीसँग भोलि खेल्नेछ । कीर्तिपुरस्थित त्रिवि क्रिकेट मैदानमा आज हुने पहिलो क्वालिफायर खेलमा जनकपुर बोल्ट्स र सुदूरपश्चिम रोयल्सबीच प्रतिस्पर्धा हुनेछ । उक्त खेल दिउँसो १ः०० बजे हुनेछ ।
प्रतिक्रिया राख्नुहोस्