रोल्पा र रूपन्देहीमा भएको छुट्टाछुट्टै सवारी दुर्घटनामा दुई जनाको मृत्यु भएको छ । रोल्पा, माडी गाउँपालिका-६ हान्निङस्थित सडकमा हान्निङबाट मेलडाँडातर्फ जाँदै गरेको रा.४ त ८६१ नम्बरको ट्याक्टर आइतबार बिहान दुर्घटना हुँदा ट्याक्टरका सहचालक माडी गाउँपालिका-६ काजवाङ तेरा बस्ने ३९ वर्षीय लक्ष्मण दमाईको घट्नास्थलमै मृत्यु भएको छ ।
ट्याक्टर चालकलाई प्रहरीले नियन्त्रणमा लिएको छ । त्यस्तै रूपन्देही, शुद्धोधन गाउँपालिका-५ पुरैनीस्थित सडकमा लु.२ प २५४६ नम्बरको मोटरसाइकल लु.३ च ४२३० नम्बरको गाडीमा ठक्कर खाई आइतबार दिउँसो दुर्घटना हुँदा मोटरसाइकलमा सवार शुद्धोधन गाउँपालिका-६ नौडीहवा बस्ने २२ वर्षीय अनु कहारको मृत्यु भएको छ ।
दुर्घटनामा गम्भीर घाइते भएका उनको लुम्बिनी प्रादेशिक अस्पताल बुटवलमा उपचारको क्रममा मृत्यु भएको हो । साथै दुर्घटनामा घाइते भएका मोटरसाइकल चालकको सोही अस्पतालमा उपचार भइरहेको छ । गाडी चालकलाई प्रहरीले नियन्त्रणमा लिएको छ । दुर्घटनाका सम्बन्धमा प्रहरीले आवश्यक अनुसन्धान गरिरहेको छ ।
प्रतिक्रिया राख्नुहोस्