यसै वर्ष अस्ट्रेलियामा हुने टी-२० विश्वकपमा छनोट हुने आशासहित ओमान पुगेको नेपाली क्रिकेट टोली तेस्रो स्थानमा रहन सफल भएको छ । बिहिबार भएको खेलमा ओमानलाई ९ विकेटले हराउँदै तेस्रो स्थानमा रहेर नेपालले छनोट प्रतियोगिताको अन्त्य गरेको छ ।
कुल पाँच खेलेको नेपालले चार खेलमा विजयी रह्यो भने सेमिफाइनलमा युएईसंग पराजित भएपछि विश्वकप यात्राको ढोका बन्द भएको थियो ।
तेस्रो स्थानका लागि भएको खेलमा नेपालले ओमानलाई सस्तैमा समेटेको थियो । टस जितेर ब्याटिङ रोजेको ओमान २० ओभरमा ९ विकेट गुमाउँदै ८७ रनमा रोकिएको थियो ।
सामान्य लक्ष्य पछ्याएको नेपालले १७.२ ओभरमा १ विकेटको क्षतिमा विजयी लक्ष्य पूरा गरेको थियो । नेपालको जीतमा सुरुवाती ब्याट्सम्यान कुशल भुर्तेलले अद्र्धशतक प्रहार गरे ।
भुर्तेलले ५३ बल खेल्दै ३ चौका र २ छक्का मद्दतमा अविजित ५५ रन बनाए । यस्तै आरिफ शेखले अविजित २१ रन जोडे ।
पहिलो विकेटका लागि भुर्तेल र आसिफ शेखले ७.३ ओभरमा ५० रनको साझेदारी गरेका थिए । आसिफ शेख १३ रन बनाएर आउट भए । त्यसपछि भुर्तेल र आरिफ शेखले मिलेर नेपाललाई जितसम्म पुर्याए । यी दुईले दोस्रो विकेटका लागि अविजित ४० रनको साझेदारी गरे ।
ओमानविरुद्ध अर्धशतक प्रहार गरेका कुशल भुर्तेल नेपालबाट टी-२० अन्तर्राष्ट्रियमा सर्वाधिक ५ अर्धशतक प्रहार गर्ने खेलाडीसमेत बनेका छन् । उनले एक शतकसमेत प्रहार गरेका छन् । भुर्तेलले ११ खेलमा कूल ४९८ रन बनाएका छन् । यस्तै पूर्वकप्तान पारस खड्काले टी-२० मा एक शतक र ४ अर्धशतक प्रहार गरेका छन् ।
त्यसअघि मस्कटस्थित अल अमेरात रंगशालामा टस जितेर पहिले ब्याटिङ गरेको ओमान नेपालका कप्तान सन्दीप लामिछानेले ३ विकेट लिएपछि ८७ रनमै रोकिएको थियो ।
नेपाली बलरहरू हाबी भएपछि ओमानका कुनै पनि ब्याटरले लामो इनिङ खेल्न सकेनन् । कप्तान जिसन मक्सुद (२१) र आयान खान (१६), नसिम खुसी (१५) र कलिमुल्लाह (१४) ले मात्र दोहोरो अंकको रन छुन सके ।
दोस्रो ओभरमै ओपनर जतिन्दर सिंह रनआउट भएपछि नेपालले पहिलो सफलता पाएको थियो । अर्को ओभरमा कमलसिंह ऐरीले सोएव खानलाई कप्तान सन्दीप लामिछानेबाट क्याच आउट गरे । पाँचौं ओभरमा ओमानका अर्का ओपनर कश्यप प्रजापतीलाई ५ रनको व्यक्तिगत स्कोरमा आउट गरेपछि पावर प्ले मा १९–३ को कमजोर स्थितिमा थियो ।
त्यसयता नेपाली स्पिनरहरू कप्तान लामिछाने, आरिफ शेख र सागर ढकालले विकेट लिइरहे । लामिछानेले सर्वाधिक ३ विकेट लिए । उनले चार ओभरमा १३ रन खर्चिए । आरिफ शेख, अविनाश बोहोरा, सागर ढकाल र कमलसिंह ऐरीले १–१ विकेट लिए । यो प्रतियोगितामा पहिलो खेल खेलेका सागरले ३ ओभरमा १९ रन खर्चिए ।
प्रतिक्रिया राख्नुहोस्