नेपालको सत्ता राजनीतिमा केही सीमित व्यक्तिहरुको हालिमुहाली भैरहँदा देश विकास नभएको आम जनताको विश्लेषण भैरहँदा विकल्पको खोजी समेत हुन थालेको छ ।
कतिपय स्थानमा शीर्ष तहका नेताहरुलाई भोट नगरौं, उनीहरुलाई विश्राम दिंदै नयाँ र युवा पुस्तालाई अघि सारौ भन्ने आवाज सामाजिक संजालहरुमा उठिरहेको छ ।
केही दिनयता ‘No Not Again’, ‘NO NOT AGAIN’ र ‘No Not again’ लगायतका फेसबुक पेज र समूहबाट भोट नगर्न आव्हान गर्दै सामग्रीहरु सम्प्रेषण हुँदै आएका छन् ।
यसबीचमा निर्वाचन आयोगले शीर्ष नेताहरुलाई मत नदिऔं, उनीहरुलाई हराउँ भन्दै सामािजक संजालबाट सम्प्रेषण भए कारबाही गर्ने भनेपछि यसको आलोचना हुन थालेको छ ।
आयोगले मंगलबार एक विज्ञप्ति जारी गरी विभिन्न नामका फेसबुक पेज र ग्रुपबाट भ्रामक र द्वेषपूर्ण श्रव्य र श्रव्यदृश्य सामग्री प्रकाशन भएकोले तत्काल बन्द गर्न निर्देशन दिंदै यी पेजबाट बन्द नगरे विद्युतीय कारोबार ऐन अन्तर्गत कारबाही गर्ने चेतावनी दिएको थियो ।
आयोगका प्रवक्ता शालिग्राम शर्मा पौडेलले जारी गरेको विज्ञप्तिमा यस्तो कसूर गर्नेलाई एक लाख रुपैयाँसम्म जरिवाना वा पाँच वर्षसम्म कैद वा दुबै सजाय हुने चेतावनी समेत दिइएको छ ।
आयोगको यो विज्ञप्तिपछि नेकपा एमालेका नेता भीम रावलले संविधानले दिएको अभिव्यक्ति स्वतन्त्रताको हनन् भएको भन्दै आक्रोश पोख्नुभएको छ । उहाँले ट्वीट गर्दै शीर्ष नेताका बिरुद्धमा बोल्न नपाइने हो भने अहिले नै उनीहरुलाई विजयी घोषणा गर्न सुझाव दिनुभएको छ ।
उहाँको ट्वीट यस्तो छ- “कसैलाई मतदान गरौं वा नगरौं भन्न नपाइने भए निर्वाचन आयोगले ‘शीर्ष’ ठानेका नेताहरूलाई अहिले नै ‘विजयी’ घोषणा गरिदिए कसो होला ? यद्यपि आयोगको भनाई नेपालको संविधानको धारा १७ को विचार र अभिव्यक्तिको स्वतन्त्रता र १९ को सञ्चारको हक विरूद्ध छ ।”
प्रतिक्रिया राख्नुहोस्