बेलायती राजकुमार ह्यारीकी माता राजकुमारी डायना पेरिसमा पापाराजीहरुबाट बच्न कारको गति तीब्र हुँदा दुर्घटनामा परेर मृत्यु भएको थियो । अहिले राजकुमारी ह्यारी र पत्नी मेगन मार्कललाई पनि पापाराजीहरुले पछ्याएको समाचार बीबीसीले सार्वजनिक गरेको छ ।
बेलायत छाडेर अमेरिकामा बस्दैआएका ह्यारी र मेगनको कारलाई मंगलबार एउटा पुरस्कार वितरण समारोहमा भाग लिएपछि पापाराजीहरू संलग्न एउटा घटनामा ‘खतरनाक’ ढङ्गले पछयाएको उनीहरूका प्रवक्ताले बताएका छन् ।
प्रवक्ताले जारी गरेको विज्ञप्तिमा निरन्तर दुई घण्टाभन्दा बढी समयसम्म कारलाई पछयाइएको र त्यसका कारण एक भन्दा बढी दुर्घटना हुने अवस्था झण्डै निम्तिएको जनाएका छन् । बकिङ्गम प्यालेसले कुनै प्रतिक्रिया दिएको छैन ।
उता न्यू योर्क प्रहरीका प्रवक्ताले कसैलाई पनि पक्राउ नगरिएको र कोही पनि घाइते नभएको जनाए पनि बीबीसी न्यूजले सबै विवरणहरूको स्वतन्त्र रूपमा पुष्टि गर्न सकेको छैन।
तर बुधवार दिनभर त्यसबारे विभिन्न किसिमका बयान र सूचनाहरू प्राप्त भइरहेका थिए । न्यू योर्क प्रहरीले ह्यारी र मेगनसँग सम्बन्धित घटना भएको र कैयौँ फोटोग्राफरहरूले ‘उनीहरूको सवारीलाई चुनौतीपूर्ण बनाएको’ बताएको छ ।
बीबीसीका अनुसार ह्यारी र मेगन साथीको घरमा बसिरहेका छन् । सुरक्षा चुनौती थपिने गरी उनीहरू सोझै आफू बस्ने स्थानमा फर्किएनन् । उक्त जोडी र मेगनकी आमा डोरियाले पापाराजीहरूबाट जोगिन म्यानह्याटनको प्रहरी स्टेसनमा आश्रय लिने प्रयास गरेको पनि जनाइएको छ।
त्यसपछि उनीहरूले न्यू योर्कको ट्याक्सी प्रयोग गर्ने योजना बनाए । उक्त ट्याक्सी र त्यहाँभित्र ह्यारी, मेगन, डोरिया र सुरक्षाअधिकारी बसेको फोटोग्राफरहरूले देखेपछि उनीहरू आफ्नै सवारी साधनमा फर्किएका थिए ।
प्रतिक्रिया राख्नुहोस्