विपद्मा पूर्वतयारी पहिलो सर्त हो, मन्त्रालयले आवश्यक परिपत्र गरिसक्यो : स्वास्थ्यमन्त्री बस्नेत

स्वास्थ्य तथा जनसङ्ख्यामन्त्री मोहनबहादुर बस्नेतले विपद् व्यवस्थापनमा पूर्वतयारी पहिलो सर्त हुनुपर्ने र पूर्वतयारीका गतिविधि चुस्त हुने सके धेरै विपद्जन्य घटना रोक्न सकिने बताउनुभएको छ । उहाँले राहतमा पनि पूर्वतयारी प्रभावकारी हुँदा यसबाट क्षति कम गर्न र उद्धार गर्न पनि सहज हुने प्रतिक्रिया दिनुभयो ।

आइतबार विपद् व्यवस्थापनसम्बन्धी सिंहदरबारमा भएको कार्यक्रममा उहाँले विपद्का समयमा उद्धार सामग्रीको अभाव हुने गरेको विगतको अनुभवन सुनाउँदै त्यस विषयमा बेलैमा सजग हुनुपर्नेमा जोड दिनुभयो । उहाँले भन्नुभयो, “यस विषयमा गम्भीरताका साथ लागौँ, आपत्विपत्मा महामारी रोगव्याधि, विमार, सरुवा रोग लाग्नसक्छ, त्यसमा सबै तयारीमा जुट्नुपर्छ ।”

उहाँले स्वास्थ्य मन्त्रालयले आवश्यक तयारी गर्न थालिसकेको र मातहतका निकायलाई निर्देशन पनि दिइसकेको जानकारी दिनुभयो । कोभिडका समयमा नेपाललाई तर्साइसकेको स्मरण गर्दै मन्त्री बस्नेतले सावधानी अपनाउन सक्यो भने त्यो देशले कम क्षति बेहोर्छ भन्ने कुरा कोभिडकै बेलामा देखिएको पनि उहाँले बताउनुभयो ।

विपद्का बेलामा तत्कालै ढुवानी गर्न नसक्ने सामग्री तथा वस्तुको समयमै उचित ठाउँमा व्यवस्थापन गर्न जरुरी रहेको पनि उहाँले औँल्याउनुभयो । उहाँले न्यूनतम आवश्यकताका सामानमा ध्यान दिनुपर्नेमा जोड दिँदै स्वास्थ्य मन्त्रालयले त्यसमा अभियान सुरु गरिसकेको र जिल्लाहरूमा परिपत्र पनि गरिसकेको जानकारी दिनुभयो ।