रविले पार्टी पनि ठगेका छन्, दुईवटा पासपोर्ट छ, छानबिन हुनुपर्छ : ढकाल

राष्ट्रिय स्वतन्त्र पार्टी (रास्वपा)का निलम्बित महामन्त्री मुकुल ढकालले पार्टी सभापति तथा उपप्रधान एवं गृहमन्त्री रवि लामिछानेले सहकारी मात्र होइन पार्टी पनि ठग्ने गरेको आरोप लगाउनुभएको छ ।

पार्टीको सबै पदीय जिम्मेवारीबाट हटाइएपछि बुधबार पत्रकार सम्मेलन गर्दै ढकालले लामिछानेले पार्टीभित्र अपारदर्शी आर्थिक क्रियाकलाप जारी राखेको बताउँदै सहकारी मात्र होइन पार्टी पनि ठगेको आरोप लगाउनुभएको हो ।

ढकालको दावी छ, ऋण छ भनेर पार्टी कोषबाट रकम लैजाने काम भएको जनाउँदै पार्टीका जिम्मेवार पदाधिकारीलाई कुनै भुक्तानी नदिन भन्दै पारदर्शी रूपमा हरहिसाब राखेर मात्र खर्च गर्ने व्यवस्था गर्न आग्रह गर्नुभएको छ ।

यसै गरी ढकालले पार्टी सभापति रवि लामिछानेमाथिको सहकारी र पासपोर्ट प्रकरणमा छानबिन गर्न पार्टीभित्रै उच्चस्तरीस्य समिति गठनको माग गर्नुभएको छ ।

रविसँग दुईवटा पासपोर्ट रहेको अरोप लगाउनुभएका ढकालले लामिछानेमाथि सर्वोच्च अदालतले नै अनुसन्धान गर भनेकाले पार्टीले पनि छानबिन समिति गठन गर्नुपर्ने बताउनुभयो ।

“हिजो उहाँ (रवि लामिछाने)ले आफूले कुनै सहकारीबाट ऋण लिएको छैन र आफूविरुद्ध जाहेरी पनि छैन भनिरहनुभएको थियो । तर सर्वोच्च अदालतले उहाँमाथि गम्भीर प्रश्न उठाएको छ । त्यसकारण पार्टीबाटै उच्चस्तरीय समिति बनाएर उहाँमाथि छानबिन गर्नुपर्छ ।”

यसै गरी उहाँले आफूले जनताको आवाज बोल्दा कारबाहीमा परेको दावी गर्दै अब जनतालाई नै सोध्न पुनः जनताको माझमा जाने पनि बताउनुभयो ।

उहाँले सभापति रवि लामिछानेलाई केपी शर्मा ओली, प्रधानमन्त्री पुष्पकमल दाहाल ‘प्रचण्ड’ र शेरबहादुर देउवको शैली मन पर्न थालेकाले मुकुल ढकालको शैली कहाँ मन पर्छ भन्दै प्रश्न गर्नुभयो ।

यसै गरी ढकालले कांग्रेस र एमालेबीच संविधान संशोधनको सहमति भएपछि रास्वपाले प्रदेश खारेज र प्रत्यक्ष निर्वाचित कार्यकारीको पक्षमा उभिनुपर्ने पनि बताउनुभयो ।

पत्रकार सम्मेलन भनिए पनि मुकुलले कार्यक्रममा सभापति रवि लामिछानेमाथि अनेक आरोप लगाएर आफ्ना कुरा भनिसकेपछि पत्रकारहरुका प्रश्नको उत्तर नदिई बाहिरिनुभएको थियो ।