बङ्गलादेशका प्रमुख राजनीतिक दलहरूले हिन्दू प्रदर्शनकारी र सुरक्षा बलबीच भएको झडपमा एक वकिल मारिएपछि व्यापक अशान्तिका बीच शान्तिको आह्वान गरेका छन् ।
एउटा र्यालीका क्रममा बङ्गलादेशी झण्डाको अनादर गरेको आरोपमा पक्राउ परेका हिन्दू आध्यात्मिक गुरु चिन्मय कृष्ण दास ब्रह्मचारीका आक्रोशित समर्थकहरूले उहाँलाई जमानत नदिइएपछि प्रहरीसँग भएको झडपमा सार्वजनिक अभियोजक सैफुल इस्लाम अलिफको मङ्गलबार मृत्यु भएको थियो ।
धार्मिक सम्बन्धहरू १७ करोड जनसङ्ख्या भएको बहुसङ्ख्यक मुस्लिम राष्ट्र बङ्गलादेशमा अस्थिर भएका छन् । यहाँ विद्यार्थी नेतृत्वको क्रान्तिले अगस्टमा स्वेच्छाचारी पूर्वप्रधानमन्त्री शेख हसिनालाई अपदस्थ गरी छिमेकी भारतमा पलायन गर्न बाध्य बनाएको थियो ।
हसिनाको १५ वर्षको कार्यकालका दुई मुख्य प्रतिद्वन्द्वी बङ्गलादेश नेसनल पार्टी (बिएनपी) र जमात–ए–इस्लामीले संयम अपनाउन आग्रह गरेका छन् ।
प्रथम आलो दैनिकले शुक्रबार बिएनपी महासचिव मिर्जा फखरूल इस्लाम आलमगिरलाई उद्धृत गर्दै हसिनाको अवामी लिगको सन्दर्भमा पछिल्लो भड्काउको पछाडि ‘पराजित फासीवादी समूह’ रहेको बताएको थियो ।
“यो घटना पूर्णतः अनुचित छ”, उहाँले अखबारलाई भन्नुभयो, “हामी यसको कडा निन्दा गर्दछौँ र सबैलाई परिस्थितिलाई शान्तपूर्वक हेर्न आग्रह गर्दछौँ ।”
जमातका शफिकुर रहमानले निरन्तर अशान्तिको दोष ‘देशलाई अस्थिर पार्ने षड्यन्त्रकारी निहित समूह’ माथि लगाउनुभयो ।
यद्यपि इन्टरनेसनल सोसाइटी फर कृष्ण कन्सेसनेस (इस्कोन) माथि प्रतिबन्ध लगाउने मागका लागि सडकमा विरोध प्रदर्शनको आह्वान गरिएको छ । हरे कृष्ण आन्दोलनका रूपमा पनि चिनिने इस्कोन अन्तर्राष्ट्रिय हिन्दू धार्मिक समूह हो र यसमा दास कथित रूपमा संलग्न हुनुहुन्थ्यो ।
इस्लामिक शिक्षालयहरूको सामूहिक हेफाजत–ए–इस्लामले शुक्रबार इस्कोनमाथि प्रतिबन्धको माग गर्दै र्याली आयोजना गरेको थियो । उसले इस्कोनलाई भारतका तर्फबाट हसिनालाई सत्तामा फिर्ता गर्ने मोर्चा हो भनेर आरोप लगाएको थियो ।
“बङ्गलादेशमा साम्प्रदायिक दङ्गा भड्काउन सावधानीपूर्वक योजना बनाइएको छ तथा भारत र शेख हसिनाको तर्फबाट यसलाई कार्यान्वयन गर्न इस्कोन यहाँ छ”, हेफाजत–ए–इस्लामका मामुनुल हकले र्यालीमा समर्थकहरूलाई भन्नुभयो ।
राष्ट्रिय झण्डा अपवित्र गर्ने
बिहीबार पूर्वी भारतीय सहर कोलकातामा प्रदर्शनकारीहरूले बङ्गलादेशमा हिन्दूहरू विरुद्धको कथित अत्याचार र दासको गिरफ्तारीको विरोधमा बङ्गलादेशी वाणिज्य दूतावास बाहिरका अवरोधहरू तोड्ने प्रयास गरेका थिए ।
हिन्दू नेताको बिना शर्त रिहाइको माग पेस गर्न प्रदर्शनकारीका प्रतिनिधिहरूलाई भवनभित्र प्रवेश गर्न अनुमति दिइएको थियो ।
बङ्गलादेश सरकारले शुक्रबार एक विज्ञप्ति जारी गर्दै कोलकातामा प्रदर्शनकारीहरूले देशको राष्ट्रिय झण्डा जलाएको र अन्तरिम नेताको पुतला जलाएको बताएको छ ।
“हिन्दू समूह बोङ्गियो हिन्दू जागरणले राष्ट्रिय झण्डा अपवित्र गरेको र मुख्य सल्लाहकार मुहम्मद युनुसको पुतला जलाएको निन्दनीय कार्यको सरकार कडा निन्दा गर्दछ”, सरकारले विज्ञप्तिमा भनेको छ ।
हसिनाले यस हप्ताको सुरुमा दासलाई हिरासतबाट ‘तत्काल रिहाइ’ गर्न माग गर्नुभएको थियो र उहाँको गिरफ्तारीलाई ‘अवैध’ बताउनुभएको थियो । उहाँले पनि वकिलको हत्याको निन्दा गर्दै यसलाई ‘मानव अधिकारको स्पष्ट उल्लङ्घन’ भन्नुभयो । भारतले दासको पक्राउ र जमानत अस्वीकारलाई ‘दुर्भाग्यपूर्ण’ भनेको छ । तर इस्कोनले दाससँग कुनै पनि सम्बन्ध अस्वीकार गर्दछ ।
“इस्कोनको अनुशासन उल्लङ्घन गरेको आरोपमा चिन्मयविरुद्ध मुद्दा दर्ता हुनुभन्दा धेरैअघि नै हामीले उहाँलाई निष्कासन गर्यौं”, समूहका बङ्गलादेशका अध्यक्ष सत्य रञ्जन बराईले शुक्रबार भन्नुभयो, “उहाँलाई आफ्नो कर्तव्यबाट मुक्त गरियो तर उहाँले आदेशको अवहेलना गर्नुभयो र आफ्ना गतिविधिहरू जारी राख्नुभयो ।”
बङ्गलादेशको सर्वोच्च अदालतले बिहीबार इस्कोनमाथि प्रतिबन्ध लगाउन माग गरेको निवेदनलाई खारेज गरेको छ । “मुसलमान, हिन्दू, बौद्ध, ईसाई… सह–अस्तित्वमा विश्वास गर्छन्, र यो सामञ्जस्य भाँच्न दिइने छैन”, अदालतले फैसला सुनायो ।
प्रतिक्रिया राख्नुहोस्