कास्की प्रहरी हिरासतमा रहनुभएका राष्ट्रिय स्वतन्त्र पार्टीका सभापति रवि लामिछानेको फोटो आफूले बाहिर ल्याएको दावी गर्दै सामाजिक अभियन्ता डा. निकोलस भुसालले उक्त फोटोको जिम्मेवारी लिनुभएको छ ।
डा.भुसालले उक्त फोटो लामिछानेलाई भेटन जाँदा प्रहरी कार्यालयको कन्ट्रोल रुममा बस्ने क्रमममा सीसीटीभी फुटेजको डिस्प्ले हुने टीभी स्क्रिनबाट प्रहरीकै अगाडि उक्त तस्बिर खिचेको स्वीकार्नुभएको छ ।
उहाँले बिहिबार फेसबुक लाइभमार्फत उक्त तस्बिर शनिबार दिउँसो ४ बजे खिचिएको र मंगलबार फेसबुकमा राखेको बताउनुभएको छ ।
भुसालले हिरासतमा लामिछानेको स्वास्थ्य अवस्था बुझेर फर्किएपछि जिल्ला प्रहरी कार्यालयको कन्ट्रोल रुममा बस्ने क्रममा सीसीटीभी फुटेजको डिस्प्ले हुने टीभी स्क्रिनबाट उक्त तस्बिर खिचेको र भाइरल गराउँछु भन्ने सोचेर नभई कसरी बसिरहेका छन् भनेर बुझाउन फोटो खिचेको बताउनुभएको छ ।
फोटो खिचेर उक्त तस्बिर बाहिर ल्याउनु गल्ती भएको स्वीकार्दै डा. भुसालले फोटो बाहिर ल्याएको प्रहरीले होइन आफूले भन्दै आफू सजाय भोग्न तयार रहेको बताउनुभएको छ ।
स्मरणीय छ, लामिछानेलाई पक्राउ गरेर कास्की प्रहरीको हिरासतमा राखिएदेखि सर्वसाधारणलाई मोबाइल लैजाने रोक लगाइएको छ । तर, डा. भुसालले कसरी मोबाइल लान पाए भन्ने प्रश्न उहाँको स्वीकारोक्तिपछि उत्पन्न भएको छ ।
जिल्ला प्रहरी कार्यालय परिसरभित्र प्रवेश गर्नेबित्तिकै गेटनजिकै प्रहरीले सर्वसाधारणको मोबाइल राख्ने गरे पनि डा. भुसालले भने आफूसँग मोबाइल नमागिएको दाबी गर्दै प्रहरीकै अगाडि उक्त फोटो खिचेको र आफूले फोटो खिचेको सीसीटीभी फुटेज प्रहरीसँग हुनुपर्ने दावी गर्नुभएको छ ।
फोटो सार्वजनिक भएपछि जिल्ला प्रहरी कार्यालय कास्कीका प्रवक्ता डीएसपी बसन्तकुमार शर्माले प्रारम्भिक अनुसन्धानमा भुसालले नै उक्त तस्बिर सार्वजनिक गरेको थाहा भए पनि घटनाको थप छानबिन भइरहेको बताउनुभएको छ ।
भुसालले सो तस्बिर गत शनिबार दिउँसो ४ बजे खिचिएको र मंगलबार फेसबुकमा राखेको बताए पनि प्रवक्ताभ शर्माले भने त्यस दिन भुसालले लामिछानेलाई नभेटेको बताउनुभएको छ ।
भुसालले भने आफू रविको स्वास्थ्य जाँचका लागि हिरासतमा गएको र त्यही बेला रविको स्वास्थ्य ठिक छ भन्ने देखाउनका लागि प्रहरीकै सामुन्ने फोटो खिचेको बताउनुभएको छ ।
प्रतिक्रिया राख्नुहोस्