पूर्व उपप्रधान तथा गृहमन्त्री एवं राष्ट्रिय स्वतन्त्र पार्टीका सभापति रवि लामिछानेको प्रहरी हिरासतभित्र सुतिरहेको तस्वीर सार्जवनिक भएपछि यसको छानबिनका लागि समिति गठन भएको छ ।
गण्डकी प्रदेश प्रहरी तालिम केन्द्रका प्रमुख तथा वरिष्ठ उपरीक्षक मुकुन्द मरासिनीको नेतृत्वमा चार सदस्यीय समिति गठन गरिएको हो ।
हिरासतको कोठामा लामिछाने सिरक ओढेर सुतिरहेको तस्बिर बुधबार सामाजिक सञ्जालमा सार्वजनिक भएपछि कसरी बाहिर आयो भन्ने बहस बिहीबार सुरु भएको थियो ।
रास्वपाले तस्बिर सार्वजनिक हुनुमा प्रहरीलाई दोष दिएको थियो । लामिछानेकै सहयोगी दीपक बोहोराले बुधबार राति फेसबुकमा लामिछाने कास्की प्रहरीको हिरासतभित्र सिरक ओढेर सुतिरहेको तस्बिर राखेका थिए ।
सो तस्वीर डा. निकोलस भुसालले खिचेको बताउँदै त्यसको जिम्मा लिने र कानुन बमोजिम सजाय भोग्न तयार रहेको बताइसक्नुभएको छ ।
तस्वीर सार्वजनिक गर्ने डा. भुसालले बिहिबार फेसबुक लाइभबाट तस्वीर कसरी खिचेको भन्ने स्पष्ट पार्नुभएको छ । उहाँले उक्त तस्बिर गत शनिबार दिउँसो ४ बजे खिचिएको र मंगलबार फेसबुकमा राखेको बताएका छन् । त्यो दिन लामिछानेलाई भेट्न र हौसला दिन हिरासतमै गएको बताउनुभएको छ ।
हिरासतमा लामिछानेको स्वास्थ्य अवस्था बुझेर फर्किएपछि जिल्ला प्रहरी कार्यालयको ‘कन्ट्रोल रुम’ मा बस्ने क्रममा सीसीटीभी फुटेजको ‘डिस्प्ले’ हुने टीभी ‘स्क्रिन’ बाट उक्त तस्बिर खिचेको डा. भुसालले बताउनुभएको छ ।
उहाँले भन्नुभएको छ, “भेटेर निस्किएपछि सीसीटीभीको मनिटरमा फोटो खिचेको हुँ, हिरासतभित्र खिचेको होइन, सीसीटीभी क्यामेराको फुटेज खिचेको हो । अन्यथा सोचेको थिइँन, तर गल्तीको लागि जिम्मेवारी लिएर क्षमा माग्छु ।”
लामिछानेको तस्बिर बाहिरिएपछि प्रहरीको आलोचना भएको छ । जिल्ला प्रहरी कार्यालय परिसरभित्र प्रवेश गर्नेबित्तिकै गेटनजिकै प्रहरीले सर्वसाधारणको मोबाइल राख्ने गरेको छ भने भुसालले कसरी मोबाइल लगे र तस्वीर खिच्न कसरी दिइयो भन्ने प्रश्न उठेको छ ।
जिल्ला प्रहरी कार्यालय कास्कीले बिहीबार विज्ञप्ति जारी गर्दै उक्त तस्बिर सार्वजनिक भएकोप्रति गम्भीर ध्यानाकर्षण भएको जनाएको छ ।
यस विषयले अहिले नयाँ बहस पनि ल्याएको छ । कतिपय राजनीतिज्ञले प्रहरी प्रमुखमाथि नै कारबाही हुनुपर्ने बताइरहेका छन् ।
त्यस्तै कतिपय सुरक्षा विज्ञले हिरासतको तस्बिर सार्वजनिक हुनुमा प्रमुख रूपमा प्रहरीकै कमजोरी भएको र यसले अनुसन्धानमा समेत असर पर्नसक्ने बताएका छन् ।
नेपाल प्रहरीका पूर्वडीआईजी हेमन्त मल्लले सुरक्षाका हिसाबले हिरासतभित्रको तस्बिर सार्वजनिक हुनुले सुरक्षा व्यवस्थाको कमजोरी देखिनुका साथै जारी अनुसन्धानमा समेत असर पर्ने बताउनुभएको छ ।
प्रतिक्रिया राख्नुहोस्