समाज जतिसुकै आधुनिक र सभ्य भयो भनिए पनि महिलामाथि विभिन्न वहानामा हुने हिंसामा कमी आउनै सकेको छैन । यस्तै हिंसामा पर्दछ बोक्सीको आरोपमा कुटपिट ।
यसै क्रममा कैलालीको भजनी नगरपालिका १ गौनैयामा एक महिलालाई बोक्सीको आरोप लगाउँदै निर्घात कुटपिट गरिएको छ । प्रहरीले कुटपिट गर्ने चारजनालाई पक्राउ गरेको छ ।
यही पुस ४ गते गौनैयाकी २८ वर्षीया महिलालाई बोक्सी भन्दै निर्घात कुटपिट गर्ने कथित गुरुबा सहितका चारजनालाई पक्राउ गरिएको प्रहरीले जनाएको छ ।
पक्राउ पर्नेमा भजनी नगरपालिका १ का २८ वर्षीय मनोज चौधरी, ५१ वर्षीय बाबुराम चौधरी, ४५ वर्षीय लाहानु चौधरी र ३५ वर्षीय रुपा चौधरी रहेको कैलालीका प्रमुख प्रहरी उपरीक्षक (एसपी) पदमबहादुर विष्टले जानकारी दिनुभयो ।
उहाँका अनुसार २८ वर्षीया महिलामाथि बोक्सीको आरोपमा कुटपिट गरेको किटानी जाहेरी परेपछि चारैजनालाई इलाका प्रहरी कार्यालय भजनीले पक्राउ गरेको हो ।
किटानी जाहेरी दिइएका मध्ये दुईजना फरार रहेकाले उनीहरुको खोजी जारी छ । पक्राउ परेकामध्ये मनोज चौधरी गुरुबा रहेका छन् । कुटपिटमा परेकी महिलाको धनगढीको नवजीवन अस्पतालमा उपचार भइरहेको छ ।
प्रतिक्रिया राख्नुहोस्