पूर्व प्रधानमन्त्री तथा प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले गैरआवासीय नेपालीलाई नागरिकता दिने व्यवस्था संविधानमा राखिए पनि अहिले भिसा दिने प्रावधान राखिनु हास्यास्पद भएको टिप्पणी गर्नुभएको छ ।
बिहिबार प्रतिनिधि सभामा बोल्दै प्रचण्डले सरकारले जारी गरेको अध्यादेशमा गैरावासीय नेपालीलाई भिसा दिने प्रावधान राखिएकोमा गैरआवासीय नेपालीहरूले असन्तुष्टि जनाइरहेको जनाउँदै सो टिप्पणी गर्नुभएको हो ।
उहाँले भन्नुभयो, ‘हामी सबैको सहमतिमा नेपालको संविधानमा गैरआवासीय नेपाली नागरिकताको प्रावधान हामीले राख्यौं । म प्रधानमन्त्री हुँदा मेरै हातले एनआरएनएका तत्कालीन अध्यक्ष कुल आचार्यलाई पहिलो गैर आवासीय नेपाली नागरिकता प्रदान गरेँ’, प्रचण्डले भने, ‘त्यसयता झन्डै चार हजार जना एनआरएनहरुले गैरआवासीय नेपाली नागरिकता लिइसक्नु भएको छ ।’
उहाँले अगाडि भन्नुभयो, ‘सरकारले मातहतका निकायलाई एउटा सर्कुलरसम्म नगर्दा त्यसको कार्यान्वयन हुन सकेको छैन । यो कागजको खोस्टो सरह भयो भनेर उहाँहरूले गुनासो गरिरहनु भएको छ । अहिले आएर एनआरएनहरुलाई निःशुल्क भिसा दिने प्रावधान राख्नु हास्यास्पद छ।’
संविधानले नै राजनीतिक बाहेकका सबै अधिकार नेपाली नागरिक सरह पाउने कुरा सुनिश्चित गरिसकेपछि फेरि भिसाको प्रावधान संविधानको मर्म र भावना विपरीत पनि भएको उहाँले बताए ।
‘यसले एनआरएन लगानीलाई मात्र दुरुत्साहन गर्दैन, दोस्रो तथा तेस्रो पुस्ताका एनआरएनलाई नेपालसँग जोड्ने पहलमा पनि आघात पुग्छ । त्यसैले संविधानले एनआरएनहरुलाई दिएको अधिकारमा दायाँबायाँ नहुने गरी तत्काल कार्यान्वयनमा ल्याउन आग्रह गर्नुभयो ।
प्रतिक्रिया राख्नुहोस्