कृषिलाई पार्टीको आम्दानीको स्रोत बनाउँदै आएको नेपाल कम्युनिस्ट पार्टी (नेकपा)का महासचिव नेत्रविक्रम चन्द ‘विप्लव’ले डेढ वर्षको उत्पादनले पार्टीलााई पुगेको बताउँदै चन्दा उठाउन नपरेको बताउनुभएको छ ।
शुक्रबार दैलेखमा राजनीतिक भेटघाट तथा चियापान कार्यक्रममा उहाँले सो कुरा बताउँदै पार्टलाई आत्मनिर्भर बनाएर जनतामा जाने प्रतिबद्धता जनाउनुभयो ।
उहाँले देशलाई समृद्ध बनाउने हो भने उत्पादनमा जोड दिनुपर्ने बताउँदै भन्नुभयो, “डेढ वर्षको उत्पादनले पार्टीलाई पुगेको छ । चन्दा उठाएर खानुपरेको छैन । यो देश बनाउने हो भने उत्पादनमा जोड दिनुपर्छ ।”
आफ्नो पार्टीका नेता तथा कार्यकर्तालाई अहिले खानाका लागि समस्या नभएको दाबी गर्दै पार्टीलाई तराई–मधेसमा धान, पहाडमा सुन्तला, हिमालमा स्याउ र जडीबुटी रोपेर आत्मर्निभर भएर जनतामा जाने प्रतिबद्धता उहाँको थियो ।
उहाँले चन्दा माग्ने संस्कार अन्त्य गर्ने आफ्नो अठोट रहेको स्पष्ट पार्दै भन्नुभयो, “हामीले पार्टीलाई माग्न नपर्ने अवस्थामा पुर्याउने अठोट गरेका छौँ । अब भातका लागि कसैलाई गुहार्नुपर्ने स्थिति छैन ।”
जुम्लामा सामुदायिक स्याउखेती गर्न जाने क्रममा यहाँ आइ पुग्नुभएका आफ्नो पार्टी सत्तामा नभएपनि उत्पादन गरेर आफूले खाने र गरिब जनतालाई खुवाउने अठोटका साथ काम गरिरहेको बताउनुभयो ।
प्रतिक्रिया राख्नुहोस्