रुसले शुक्रबार राष्ट्रपति भ्लादिमिर पुटिनले युक्रेनमा वासिङ्टनद्वारा प्रस्तावित युद्धविरामका बारेमा समकक्षी डोनाल्ड ट्रम्पलाई ‘अतिरिक्त’ सङ्केत पठाउनुभएको र सम्झौताको सम्भावनाका बारेमा ‘सावधानीपूर्वक आशावादी’ रहेको बताएको छ ।
अमेरिकी दूत स्टिभ विटकफले बिहीबार राति पुटिनलाई अमेरिकी–युक्रेनी योजनाको विवरण प्रस्तुत गर्नुभएको थियो । उक्त विवरणले मस्को र किएभबीच तीन वर्षको लडाइँपछि ३० दिनको शत्रुताको विराम परिकल्पना गरेको छ ।
पुटिनले ट्रम्पलाई विटकफमार्फत ‘अतिरिक्त’ सङ्केतहरू प्रेषित गर्नुभएको र ट्रम्पलाई यी सन्देशहरूबारे जानकारी दिइएपछि दुई नेताले कुरा गर्नसक्ने क्रेमलिनले बताएको छ ।
“जब विटकफले सबै जानकारी राष्ट्रपति ट्रम्पलाई ल्याउनुहुन्छ, हामी कुराकानीको समय निर्धारण गर्नेछौँ”, क्रेमलिनका प्रवक्ता दिमित्री पेसकोभले पत्रकारहरूलाई भन्नुभयो, “यस्तो कुराकानी आवश्यक छ भन्ने सबै पक्षको बुझाइ छ ।”
अमेरिकी राष्ट्रिय सुरक्षा सल्लाहकार माइक वाल्ट्जले फक्स न्युजसँगको अन्तर्वार्तामा विटकफको भ्रमणपछि अमेरिका ‘केही सावधानीपूर्वक आशावाद’ थियो भन्नुभयो ।
“सावधानीपूर्वक आशावादी हुनुका कारणहरू छन्”, वाल्ट्जको टिप्पणीमा टिप्पणी गर्दै पेसकोभले शुक्रबार भन्नुभयो, “अझै धेरै गर्न बाँकी छ, तर राष्ट्रपतिले राष्ट्रपति ट्रम्पको स्थितिसँग पहिचान गर्नुभएको छ ।”
पुटिनले बिहीबार युक्रेनसँग युद्धविरामको विचारलाई समर्थन गरेको बताउनुभयो तर उहाँले यसलाई कसरी कार्यान्वयन गरिनेछ भन्नेबारे ‘गम्भीर प्रश्नहरू’ रहेको र उहाँ ट्रम्पसँग छलफल गर्न चाहेको बताउनुभयो ।
युक्रेनलाई नाटोबाट प्रतिबन्धित गर्ने मस्कोको मागलाई सङ्केत गर्दै पुटिनले कुनै पनि सम्झौताले ‘दीर्घकालीन शान्ति’ सुनिश्चित गर्न चाहेको बताउनुभयो ।
युक्रेनी राष्ट्रपति भोलोदिमर जेलेन्स्कीले बिहीबार प्रस्तावप्रति पुटिनको अनिश्चित प्रतिक्रियालाई ‘धेरै छली’ भनेर निन्दा गर्नुभयो भने जर्मनीले यसलाई ‘ढिलाइ गर्ने रणनीति’ भनेको छ ।
प्रतिक्रिया राख्नुहोस्