नेपाल क्रिकेट संघ (क्यान) निलम्बनको अवस्थामा रहेका बेला राष्ट्रिय क्रिकेट खेलाडीको तलब व्यहोर्दैआएको अन्तर्राष्ट्रिय क्रिकेट काउन्सिल (आइसीसी)बाट सन् २०१९ को तलब दिलाउन क्यानले प्रक्रिया अघि बढाएको छ । क्यानले २०१९ को तलब प्रदान गर्नका लागि २२ क्रिकेटर र भिडियो विश्लेषक रमन सिवाकोटीको नाम आइसिसी पठाएको हो ।
क्यानका सचिव अशोकनाथ प्याकुरेलले २०१९ मा क्यान निलम्बनको अवस्थामा रहेको हुनाले सो अवधिको तलब आइसिसीले प्रदान गर्नेछ । त्यसका लागि क्यानले तलब पाउने सबै क्रिकेटसँग एक वर्षको सम्झौता गरेर आइसिसीलाई कागजात पठाएको बताउनुभयो ।
यसअघि आइसिसीले २०७५ माघमा २१ जना राष्ट्रिय क्रिकेटरलाई सन् २०१७ र १८ को तलब उपलब्ध गराएको थियो। यसपटक २२ जना क्रिकेटरको नाम पठाउनु भनेकोले क्यानले राजु रिजालको नाम थप गरेर पठाइएको हो ।
सन् २०१७ र १८ मा नेपालका लागि खेलेका क्रिकेटरलाई ए, बी र सी गरी तीन श्रेणीमा राखिएको थियो। आइसिसीले ‘ए’ श्रेणीका लागि मासिक रु ३५ हजार, ‘बी’ श्रेणीका लागि रु २५ हजार र सी श्रेणीका खेलाडीलाई रु १५ हजार मासिक तलब उपलब्ध गराएको थियो ।
सन् २०२० को तलब भने क्यानले नै दिनेछ । त्यसका लागि क्यानले पुरुष र महिला क्रिकेटरसँग छिट्टै सम्झौता गर्ने जनाएको छ ।
क्यानले ‘ए’ श्रेणीमा रहेका पारस खड्का, ज्ञानेन्द्र मल्ल, शरद भेषावकर, वसन्त रेग्मी, सोमपाल कामी, दीपेन्द्र सिंह ऐरी र सन्दीप लामिछाने । ‘बी’ श्रेणीका आरिफ शेख, करण केसी, ललित भण्डारी, अनिलकुमार साह, रोहित पौडेल, ललितनारयण राजवंशी र शक्ति गौचन तथा ‘सी’ श्रेणीका सुवास खकुरेल, सागर पुन, दिलीप नाथ, सुनिल धमला, सुसन भारी, प्रदीप ऐरी र विनोद भण्डारी र थप राजु रिजालको नाम पठाएको हो ।
प्रतिक्रिया राख्नुहोस्